Aasmund Nordstoga og Åsmund Reistad

I meir enn 20 år har Aasmund Nordstoga og Åsmund Reistad gledd sitt publikum. Snart slepper dei plate!

På scena er duoen noko for seg sjølv. Med lun formidling, varm humor og masse speleglede har dei framført viser og folketonar av ulikt slag - vakre, morosame, stillferdige og fengande. 
Dei kan sjå attende på tallause speleoppdrag i kulturhus, kyrkjer og på konferansemiddagar, på fjellgardar, bygdetun og til og med intimkonsertar heime hjå folk. Over alt der dei ferdast, set dei sine spor. Dei er ei musikalsk lukkepille.
I februar 2023 kjem den fyrste duoplata deira. Den inneheld viser frå Hartvig Kirans visebok «Tom Doley og andre viser». Hartvig Kiran var omsetjar, lyrikar og kringkastingsmann. Boka kom ut på Det norske Samlaget i 1962. Den inneheld Kirans nynorske omsetjingar av gamle amerikanske folke- og skillingsviser. Nokre av songane er oppført med kjende låtskrivarar, andre har ukjent opphav. Nokre er svært gamle, med røter attende til 1700-tallet.

Engelskspråklege versjonar er utgjevne på plate av ei rad amerikanske artistar. Forutan «Tom Doley» er nok «Sixteen tons» den som har sett størst spor etter seg. Tennessee Ernie Fords versjon, med den ikoniske klarinettintroen, vart ein millionselgjar. Sidan har m.a. Elvis og B.B. King hatt songen på repertoaret. Hartvig Kirans norske omsetjingar blei ein del av visebylgja på 60-og 70-talet, og bruka av m.a. Lillebjørn Nilsen, Lars Klevstrand og Hege Tunaal.

Åsmund Reistad – Aasmund Nordstoga
Kom i kontakt med Aasmund og Åsmund:
eline@skyskraperartist.no
+47 902 57 609
eller fyll ut skjemaet under: